जिल्हा परिषद केंद्रीय प्राथमिक शाळा मारतळा येथील उपक्रमशील शिक्षक रवी ढगे यांच्या भविष्यवेधी शिक्षणाच्या माध्यमातून राबविण्यात येणाऱ्या सर्व उपक्रमांची प्रसिद्ध दैनिक लोकमत संपादक भारत दाढेल यांच्या माध्यमातून आजच्या संडे स्टोरी मध्ये प्रसिद्ध करण्यात आली आहे.
संडे स्टोरी-भारत दाढेल, नांदेड
शाळेतील मुलांमध्ये वाचनाची आवड निर्माण होण्यासाठी मुलांना दर शनिवारी 'गोष्टीचा शनिवार' या उपक्रमांतर्गत उपलब्ध असलेली थोरामोठ्यांची पुस्तके वाचण्यास दिली जातात. मुलांना वर्गखोलीत बसून वाचन करण्याचा कंटाळा येतो, तेव्हा वर्गाबाहेर मोकळ्या वातावरणात शाळेच्या परिसरातील एखाद्या झाडाखाली बसून वाचन घेतले जाते. चौथी ते सातवीतील सर्व विद्यार्थी या पुस्तक वाचन चळवळीत सहभागी झाले आहेत. भारतरत्न डॉ. बाबासाहेब आंबेडकर यांच्या जयंतीनिमित्ताने वृक्ष वाचनालयास डॉ. बाबासाहेब आंबेडकर यांचे नाव देण्यात आले. दर शनिवारी परिसरातील झाडांना दोरी बांधून त्यावर पुस्तकांची योग्य मांडणी केली जाते. मुलांना आवडणारी पुस्तके त्या ठिकाणी उपलब्ध करून दिली जातात. हा उपक्रम चौथी ते आठवीपर्यंतच्या विद्यार्थ्यांसाठी अत्यंत महत्त्वाचा आहे. मुलांना या वयात वाचनाची आवड निर्माण झाली की त्यांचे भावविश्व अधिक समृद्ध होते. त्यामुळे हा उपक्रम चर्चेत आला आहे.
मुलांना जापनीज भाषा शिकवली
• भविष्यवेधी शिक्षणाचा आधार घेऊन लर्निंग टू लर्न यानुसार विद्यार्थ्यांना जापनीज भाषा शिकण्यास प्रवृत्त केले. त्यामुळे गावखेड्यातील मुलांना आंतरराष्ट्रीय स्तरावरील भाषेची ओळख होऊन ते या भाषेद्वारे संवादही साधत आहेत.
• या उपक्रमाबद्दल त्यांचा २६ जानेवारी २०२४ रोजी जिल्हा परिषदेच्या मुख्य कार्यकारी अधिकारी यांच्या हस्ते विशेष सन्मानही करण्यात आला होता.
